पापण्या फडफडल्या की काही तरी शुभ किवा अशुभ होणार, असा अनेकांचा समज होतो. मात्र, पापण्या फडफडणे हे शुभ किवा अशुभाशी संबंधित नसून, ही प्रक्रिया मांसपेशींशी संबंधित आहे. ही प्रक्रिया आपल्या आरोग्यासंदर्भात भरपूर काही सांगून जाते. काही वेळा ही प्रक्रिया काही सेकंद होत असली, तरी ती बंद होण्यासाठी प्रसंगी एक ते दीड दिवस लागतो. ही एक सामान्य प्रक्रिया असली, तरी ती काही स्थितीत गंभीर बनू शकते.

पापण्या फडफडण्याला वैद्यकीय भाषेत 'म्योक्यामिया' असे म्हणतात. या स्थितीत डोळ्याचे स्नायू आकुंचन पावतात आणि पापण्या फडफडू लागतात. ज्या लोकांना नजरेसंबंधीची समस्या असते, त्यावेळी त्यांच्या डोळ्यांवर जास्त ताण पडतो.

अशावेळी नकळत पापण्या फडफडतात. मद्यपानामुळेही पापण्या फडफडतात, असे म्हटले जाते. असे असेल तर मद्यापासून लांब राहिलेलेच योग्य ठरते.
चहा, कॉफी, सॉफ्ट ड्रिंक्स आणि चॉकलेटमध्येही 'कॅफिन' हा घटक असतो. या पदार्थांच्या जास्त सेवनाने काहीवेळा डोळ्यांच्या आरोग्यावर परिणाम होतो. असे जर होत असेल तर या पदार्थांपासून दूर राहणेच लाभदायी ठरते. काही संशोधनांमध्ये मॅग्नेेशियमसारख्या पोषक तत्त्वांच्या कमतरतेमुळेही डोळे फडफडतात. काहीवेळा संगणक, मोबाईल अथवा टॅबलेटची स्क्रीन जास्त वेळ पाहिल्यानेही पापण्या फडफडू लागतात. अशावेळी ब्रेक अत्यंत महत्त्वाचा ठरतो. संशोधकांच्या मते, पापण्या फडफडणे ही प्रक्रिया शुभ किवा अशुभामुळे होत नाही, हे मात्र निश्‍चित.