'जना' म्हणजे स्त्री. तेंव्हा 'जनाना' किंवा 'जनानखाना' म्हणजे जिथे स्त्रिया राहतात ती जागा. यालाच 'हरम' असे सुद्धा म्हणतात. विवाहितांचे किंवा उपस्त्रीयांचे परपुरुषांशी आणि अविवाहितांचे खालच्या हुद्द्याच्या अधिकाऱ्यांशी संबंध होऊ नयेत म्हणून पातशाहाच्या महालात स्त्रियांना पुरुषांपासून वेगळ्या अशा ठिकाणी ठेवले जात असे. त्यालाच जनानखाना असे म्हणतात. जनानखाना म्हणजे केवळ युद्धात पळवून उपभोगण्यासाठी आणलेल्या गुलाम स्त्रियांना ठेवायची जागा नव्हे, जरी का प्रायः त्यांना सुद्धा जनानखान्यातच ठेवण्यात येत असे. म्हणजे पातशाहच्या आई-बहिणींपासून ते गुलाम उपस्त्रीपर्यंत आहेत नाहीत त्या सगळ्या बायका या जनानखान्यात असत. अर्थातच त्यांच्या पातळीनुसार त्यांना वागणूक ही वेगळीच मिळत असणार. या जनानखान्यांनात पातशाह आणि त्याच्या कुटुंबातील पुरुषांव्यतिरिक्त इतर पुरुषांना मुक्त प्रवेश नसे. म्हणून तिथे कारभारासाठी तृतीयपंथीय म्हणजेच खच्ची केलेले पुरुष असत. सिनेमांत वगैरे मोगल बायकांसोबत नेहमी एक "मावशी" दाखवली जाते ती त्या कारणासाठी.