मालमत्ता खरेदी करताना मुद्रांक शुल्क अर्थात स्टॅम्प ड्युटी भरावी लागते, हे सर्वांनाच माहीत असतं. पण हे शुल्क नेमकं किती, कशासाठी, कशा पद्धतीने घेण्यात येतं याविषयी मात्र माहिती नसते. म्हणूनच मुद्रांक शुल्क आणि त्याच्याशी संबंधित काही प्रश्नांची ही उत्तरं.

विक्रीकर आणि आयकराप्रमाणेच मुद्रांक शुल्क हा एक कर आहे आणि तो वेळेवर पूर्णपणे भरावा लागतो. हे शुल्क भरण्यास उशीर झाला तर संबंधित सरकारी विभाग विलंब शुल्कही आकारतो आणि तो भरणं बंधनकारक असतं. मुद्रांक शुल्क भरल्यानंतर पावती मिळते, ही पावती किंवा कागदपत्रं हे एक कायदेशीर कागदपत्र असतं आणि ते न्यायालयात पुरावा म्हणून ग्राह्य धरण्यात येतं. पण हे कागदपत्र व्यवस्थितपणे मुद्रांकित केलेलं असलं पाहिजे. ते तसं नसेल तर न्यायालय त्याला पुरावा मानत नाही.

तुमच्या मालमत्तेवर किती मुद्रांक शुल्क देणं लागतं, हे कसं माहित करून घ्याल?

मालमत्तेचं बाजारमूल्य किती आहे, हे माहीत करून घ्या आणि रेडी रेकनर रेटवरून मुद्रांक शुल्क खालीलप्रमाणे काढा.

तुम्हाला संबंधित विभाग/गावाचं नाव आणि सी.एस. (Cadastral Survey)/सी.टी.एस. नंबर (City Title Survey number) माहीत करून घ्या.

तुमचा विभाग/गावाचं नाव आणि तुमच्या मालमत्तेचा सी.एस./सी.एस.टी. नंबर रेडी रेकनरच्या कोणत्या व्हॅल्युएशन झोन/सब-झोनमध्ये येतो ते शोधा.

रेडी रेकनरच्या तक्त्यात तुमच्या मालमत्तेचा प्रति चौ.मीटरप्रमाणे काय दर दिलेला आहे, ते बघा. त्यानंतर मालमत्तेच्या बिल्टअप एरियाचा(चौ.मीटरनुसार) त्या दराने गुणकार करा.