लोकमत हे तात्पुरते व विशिष्ट प्रसंगापुरते मर्यादित असते. ते कधीही स्थिर किंवा कायमस्वरूपी नसते त्यात नेहमी बदल होत असतो. लोकमतात बदल घडण्याची कारणे अभ्यासकांनी नोंदविलेली आहेत. लोकमतात झालेल्या बदलातून सत्ताबदल होत असतो उदा. २०१४ च्या १६ व्या लोकसभेत काँग्रेस पक्षाचा पराभव होऊन भारतीय जनता पक्ष सत्तेवर आलेला दिसतो हा लोकमतातील बदल मानता येईल. रस्किनच्या मते, प्रत्येक चित्राचे व ग्रंथाचे चाहते अलग अलग असतात त्याप्रमाणे प्रत्येक प्रसंगात विविध प्रकारचे लोकमत व्यक्त होते. त्यामुळे लोकमत बदलाची पुढील कारणे व घटक सांगता येतात. १) परिस्थितीतील बदल २) नेतृत्वाचा प्रभाव ३) घटनांचा प्रभाव ४) संसूचन माध्यमाचा प्रभाव