*सध्याचा कडक उन्हाळा लोक दिवसभर कसेबसे सहन करतात. सायंकाळ होताच थंड वार्‍याची झुळूक मनाला थंडावा देऊन जाते. मात्र, डासांमुळे खुल्या जागेत, मोकळ्या वातावरणात आपण जास्त वेळ बसू शकत नाही. तसेच जोपर्यंत पंख्याची घरघर सुरू आहे तोपर्यंत आपण घरात बसू शकतो. मात्र, वीजप्रवाह खंडित होताच पुन्हा आपण घामोघाम होतो.  वीज गेल्यानंतरच खरेतर डासांना रक्त प्राशन करण्याची संधी मिळते. मात्र, तुम्हाला माहीत आहे का? हे डास लोकांना कमी-अधिक प्रमाणात चावतात.*              

काही लोकांना डास मोठ्या, तर काहींना कमी प्रमाणात चावतात. डास असे का करतात? यासंदर्भात संशोधकांनी नुकतेच एक संशोधन केले. या संशोधनातील निष्कर्ष सर्वांनाच आश्‍चर्याचा धक्का देणारे ठरले.
संशोधकांनी वेगवेगळ्या रक्तगटाच्या लोकांचे गट तयार केले. यामध्ये असे सिद्ध झाले की, ज्या लोकांचा रक्तगट ‘ओ’ होता, त्यांचा डासांनी अनेकवेळा चावा घेऊन त्यांचे रक्त प्राशन केले होते. मात्र, ज्यांचा रक्तगट ‘ए’ आणि ‘बी’ होता त्यांचा या डासांनी एकदाच चावा घेतला होता. विशेष म्हणजे, हे संशोधन अनेकवेळा करण्यात आले. मात्र, प्रत्येकवेळी त्याचा निष्कर्ष एकच राहिला. म्हणजेच या संशोधनातील ठोस निष्कर्ष म्हणजे ज्या लोकांचा रक्तगट ‘ओ’ आहे त्यांचे रक्त डासांना फार आवडते, म्हणूनच ते या लोकांचा चावा घेऊन रक्त प्राशन करतात. तर ए आणि बी गटाचे रक्त या डासांना तितकेसे आवडत नाही. यामुळे या रक्तगटांच्या लोकांना डास जास्त प्रमाणात चावत नाहीत.

माझ्या मते तसे काही नाही. डासांना कर्तव्य रक्ताशी असते, रक्तगटाशी त्यांना काही घेणेदेणे नसते. नवजात बालकापासून ते जख्खड म्हाताऱ्यापर्यंत डास कोणाचेही रक्त पितो व रक्त पिताना तो रक्तगटाची चव बघत बसत नाही. काटकुळ्या माणसापासून ते लठ्ठ माणसांपर्यंत सर्वांचे रक्त पितो.