हिंदू धर्माची स्थापना नेमकी किती वर्षांपूर्वी झाली, हे समजणे अवघड आहे. पण जगातील सर्वात जुना धर्म म्हणून हिंदू धर्माची महती सर्वत्र गायली जाते. या धर्माची स्थापना आणि उभारणी अतिशय विचारपूर्वक आणि सर्व बाबी ध्यानात घेऊन केली आहे, हे निश्चित. या धर्माच्या रचनेत मानसिक, वैचारिक, आध्यात्मिक भव्यता आणि विशालता सामावली आहे, ऐहिक जीवन सुखकर व्हावे आणि ते तसे होत असतानाच पारलौकिक कल्याण साधले जावे, असा दोन्ही बाजूंचा विचार हिंदू धर्माच्या रचनेत आणि योजनेत एकत्रितपणे गुंफला गेला आहे. या धर्माच्या उज्वल पार्श्वभूमीचा आणि त्यातील वैचारिक आध्यात्मिक उत्तुंगतेचा मागोवा ज्योतिर्भस्कर जयंत साळगावकर यांनी 'धर्मबोध'मध्ये घेतला आहे.
काही प्रथा परंपरांना अंधश्रद्घा म्हणवून त्या पाळणाऱ्यांना अनेकदा मूर्खात काढले जाते, मात्र त्यांच्यामागे कोणती कारणं आहेत आणि पूर्वजांनी त्या प्रथा रुढ करण्यामागे कोणता विचार केला होता, याचे विश्लेषण साळगावकर यांनी येथे केले आहे. समाजातील एका विशिष्ट वर्गाच्या विचारसरणीने हिंदू धर्माची कशा प्रकारे हानी केली, हे साळगावकर यांनी मांडले आहे. धर्माचा उगम आणि विकास, संस्कृतीची निमिर्ती, हिंदू धर्माचे वैशिष्ट्य काय, सुधारणांची कशा प्रकारे गरज आहे, जुन्या आचारांमागेही वैज्ञानिक दृष्टिकोन कशा प्रकारे होते, धर्माचा पुनविर्चार होणे ही कशी काळाची गरज आहे, यावर त्यांनी प्रकाश टाकला आहे.

हिंदू धर्माने 'वसुधैव कुटुंबकम्' अशी इच्छा बाळगली आणि 'कृण्वन्तो विश्वमार्यम्' हे उद्दीष्ट नजरेसमोर ठेवले, त्यामुळेच इतर धर्मांमध्ये आढळणारा कडवटपणा हिंदू धर्मात आढळत नाही असे साळगावकर म्हणतात. हिंदू धर्मातील १६ संस्कारांची माहितीही त्यांनी दिली आहे. बारा मराठी महिने, या महिन्यांचे वैशिष्ट्य, त्या महिन्यात येणारे उत्सव आणि मासव्रते यांची सखोल माहितीही त्यांनी दिली आहे. हिंदू धर्माची सखोल माहिती करून घ्यायची असेल आणि त्याचे अंधानुकरण टाळायचे असेल, तर हा ग्रंथ वाचणे नक्कीच उपयुक्त ठरेल.
                                   धन्यवाद सर,