सेंट्रल वॉटर अँड पॉवर रिसर्च स्टेशन : (केंद्रीय जल आणि विद्युत् अनुसंधान शाळा, CWPRS). विसाव्या शतकाच्या सुरुवातीला जलसिंचन व जलनिःसारण या क्षेत्रांतील प्रश्नांचा अभ्यास करण्यासाठी थोड्या प्रमाणावर प्रयोगशाळेत अनुसंधान (बारकाईने केलेले संशोधन) करण्याची गरज आहे, असे तेव्हाच्या ब्रिटिश सरकारच्या लक्षात आले होते. म्हणून बॉम्बे प्रेसिडेन्सीच्या (मुंबई इलाख्याच्या) पाटबंधारे विभागातर्फे विशेषतः कालवे व वाहितमल (सांडपाणी) यांच्या शास्त्रीय अभ्यासासाठी पुण्याजवळ हडपसर येथे १९१६ मध्ये एक प्रयोगशाळा स्थापन झाली.