भारतीय रेल्वेमध्ये ट्रेन गार्डचे नाव बदलून 'ट्रेन मॅनेजर' (Train Manager) असे करण्यात आले आहे. रेल्वे कर्मचाऱ्यांच्या मागणीनुसार हा बदल करण्यात आला आहे. अनेक वर्षांपासून कर्मचारी संघटना या बदलाची मागणी करत होती, कारण गार्डचे काम फक्त सिग्नलला झेंडा दाखवणे किंवा टॉर्च दाखवणे एवढेच नाही, तर त्यांची जबाबदारी अधिक आहे. त्यामुळे रेल्वे प्रशासनाने कर्मचाऱ्यांच्या मागणीचा विचार करून हे पदनाम बदलले आहे. हे पदनाम बदलले असले, तरी कर्मचाऱ्यांच्या जबाबदाऱ्यांमध्ये कोणताही बदल झालेला नाही. प्रवाशांची सुरक्षा, ट्रेनची देखभाल, आणि पार्सल सामानाची जबाबदारी पूर्वीप्रमाणेच त्यांच्यावर आहे. असिस्टंट गार्ड, गुड्स गार्ड, सीनियर गुड्स गार्ड, सीनियर पॅसेंजर गार्ड, मेल/ एक्सप्रेस गार्ड यांसारख्या पदांच्या नावांमध्ये बदल करून अनुक्रमे असिस्टंट पॅसेंजर ट्रेन मॅनेजर, गुड्स ट्रेन मॅनेजर, सीनियर गुड्स ट्रेन मॅनेजर, सीनियर पॅसेंजर ट्रेन मॅनेजर, आणि मेल/ एक्सप्रेस ट्रेन मॅनेजर असे करण्यात आले आहे.