आज भारतासारख्या देशात कुटुंबव्यवस्था जी टिकून आहे त्यामागे भरीव असे योगदान स्त्रीचेच आहे भारतातील कुटुंबव्यवस्था ही एक आदर्श व्यवस्था म्हणून जगात गणली जाते . या कुटुंबाला , प्रत्येक घटकाला एकत्र बांधून ठेवण्याचे काम त्या घरातील स्त्रीच करते . जुन्या विचारांना खोडून त्यात नवा अर्थ भरताना गवसणारा आनंद घेणारी नव्या पिढीची स्त्री आपल्या कुटुंबाच्या कल्याणासाठी , विकासासाठी वाट्टेल ते करण्याची तयारी असणारी , YES , I CAN DO IT या तत्वाचा वापर करून सातत्याने उत्तुंग प्रगती करणारी स्त्री कुटुंबाच्या आधारस्तंभाची भूमिका बजावत असते . आपल्या कुटुंबासाठी प्रसंगी मार्गदर्शक , समुपदेशक , वैद्य , आचारी अशा वेगवेगळ्या भूमिका ती जगत असते . " एक स्त्री शिक्षित झाली तर तिचे संपूर्ण कुटुंब शिक्षित होते , सुसंस्कृत होते . ” प्रत्येक कुटुंब सुसंस्कृत झाले तर समाज आपोआपच विकसित होतो . म्हणूनच कुटुंबव्यवस्थेत स्त्रीचे स्थान अतुलनीय आहे .