*'टीडीएस' म्हणजे 'टॅक्स डिडक्शन अॅट सोर्स' अर्थात उत्पन्नाच्या उगमस्थानी लागू केला जाणारा कर. कपात करणारी व्यक्ती किंवा उत्पन्न देणारी व्यक्ती हा कर कापून घेते आणि उरलेली रक्कम संबंधित व्यक्तीला देते.

*'टीडीएस' लागू होत असलेल्या उत्पन्नांमध्ये कर्मचाऱ्यांना दिला जाणारा पगार, बँकेतील ठेवींवरील व कर्जरोखे अर्थात 'बाँड्स'वरील व्याज, लॉटरीतून वा घोड्यांच्या शर्यतीतून ‌जिंकलेले पैसे, इ.
*'टीडीएस' सरकारने ठरवून दिलेल्या विविध प्रमाणांमध्ये कापण्यात येतो. विविध प्रकारच्या उत्पन्नांसाठी विविध मर्यादा निश्चित केलेल्या आहेत आणि या मर्यादांच्या वरच 'टीडीएस' आकारला जातो.

*'टीडीएस' कापून घेणारा 'टीडीएस' सर्टिफिकेट देतो. त्यामध्ये करविषयक संपूर्ण तपशील असतो. ज्याचा 'टीडीएस' कापला गेला आहे त्याने मिळवलेल्या उत्पन्नावर भरलेला कर म्हणून 'टीडीएस' गृहीत धरला जातो आणि त्या वर्षाचे आयकर विवरणपत्र ('इन्कम टॅक्स रिटर्न') भरताना तो विचारात घेतला जातो.

*'टीडीएस' कापण्याची आणि तो सरकारकडे जमा करण्याची जबाबदारी 'टीडीएस' कापणाऱ्याची असते. 'टीडीएस' ज्या महिन्यात कापला आहे त्या महिन्याच्या अखेरीस आठवड्याच्या आत हा कर जमा करायचा असतो.

*'टीडीएस'साठीचे रिटर्न 'टीडीएस' कापणाऱ्याने दर तिमाहीला विशिष्ट फॉर्ममध्ये भरायचे असतात. हे रिटर्न भरण्याची अंतिम मुदत १५ जुलै, १५ ऑक्टोबर, १५ जानेवारी आणि १५ मे अशी असते.